1ꆪ20ꑋꅑ21ꑍ，ꌜꊯꇖꈭꏓꄊꇖꃢꃀꈿꅉꆃꎭꁧꎁꄨꆏꊨꏦꍆꅉꇬꄉꐊꈴꃀꈿ，ꃀꈿꅉꆏꌜꍔꃚꌤꃅꅇꄜ、ꄐꎖꅇꄜꌋꆀꄐꌗꅇꄜꌌꄉꍤꇖ。

    ꍏꊈꎻꏹ、ꁧꎁꄨꄨꍈꒄꀻ，ꍏꊈꃛꎻꏹ、ꁧꎁꄨꃛꄨꍈꀈꎵꆞꁘ，ꍏꏓꄊꎮꊈꉼꍗꏓ、ꁧꎁꄨꃛꄨꍈꇊꊈ，ꌜꏓꄊꍰꑣꈭꇍꅐꀦꌋꃅꊈꑼꉼꃛꍗꏓꊈꑼꑸꑦꂱ，ꌜꊈꄜꉺꀯꃛꀯꍈ、ꌜꄆꒌꏳꏳꍈ、ꌜꁱꇐꑠꉼꄈꊤꎻꏹ、ꎮꃷꃛꍗꑮꍈꊈ、ꌜꏓꄊꂿꑘꌋꆀꂿꑘꁡꇤꊈꑼꉼꃛꍗꏓꊈꑼ、ꇩꇍꄹꀦꉘꒉꏱꁕꒉꄆꀖꁉꑞꅉꐥꋍꊐꃅꑘꊝꏦꄳꑸꏲ，ꌜꊈꎀꍹꀯꃛꀯꍈꁉꉼꃀꈿꅉꇬꐊ。

   ꒄꀻꇬꄉꉉꇬ，ꍔꃚꌤꃅꅇꄜꌠꆹꀋꎪꊽꇬꈐꊟꊋꊡ，ꆃꎭꆹꏟꈯꃅꄉꑮꏣꀻꃅꋊꀊꏀꍏꇩꐛꋲꐨꐥꌠꎹꉼꍗꑴꉪꇐꌌꄐꌐꅍꃅ，ꃹꅼꃅꄉꌜꊈꌜꍔꃚꄐꇐꏤꁈꃄꌬꁻꌐꂿꃆꉜꄉ，ꉈꑴꑭꄑ，ꑆꊋꌧꄉꐛꑊꀊꏀꀹꄻ，ꊇꁧꀊꂥꃅꀻꎆꈲꁧꀊꏀꌠꌊꄉꌜꑭꊂꇴꉻꁧꎁꃅꑆꊋꅐꌞ 。ꏟꈯꃅꄉꅐꑘꆹꏮꌠꌌꆃꎭꊇꁧꀊꂥꃅꀻꎆꌠꈴꈜꃅ，ꋌ꒜ꌟꃅꄉ“ꀉꒉꀊꂾꌤꌕꐘ”ꌠꃅꌊꉾꃪ，ꃶꐚꐛꐪꇬꉜꄉꊇꁧꀊꏀꌜꍣꊋꃤꀻꎆ，ꇤꐳꃅꐛꋲꐨꊋꀯꅐꀦꐛꏀꈴꅐꑘꉻꑫꀹꄻ。ꏟꈯꃅꄉꎆꊭꎆꊐꌋꆀꃼꇇꌌꎍꐽꎆꏣꀉꇨꃅꄉꀋꉬꀋꉆꅉꇬꇱ，ꃹꅼꃅꄉꄺꀱꍔꐯꀖꁉꌠꌌꊇꁧꀊꂥꃅꀻꎆꀋꉬꀋꉆꏡꁈꐘꃅꄉ ，ꐪꊛꄉꈲꁧꐥꌠꈉꐨꍔꒉ，ꃹꅼꃅꄉꁉꃑꇷꃅ，ꀋꆏꃅꄉꎆꏣꀻꎆꌠꇙꊋꌄꆣꊋꃤꊡꇨ。ꏟꈯꃅꄉꀱꉈꑴꌢꎭꁧꌠꂫꑟꐏꈬꌠꌊꄉꀋꃋꋋꇅꇬꄝꏯꀋꉆꌠꍔꍞꂿꃆꐘꃅꄉ，ꍰꑣꏓꇱꀻꎆꄹꆷꌠꌌꀋꃋꋋꇅꇬꃛꊸꌤꃅꐘꌋꆀꀊꉗꀊꎴꄐꁈꐘꃅꄉ，ꎍꐽꃅꄉꉹꁌꐥꐨꄉꀧꄺꀱ，ꏓꂱꐥꌒꄻꌒꐨꀊꅰꃅꄉꏟꈯꀕ，ꑞꅉꀊꂥꌠꌊꄉꋬꂻꄉꀧ，ꊇꁧꀊꂥꃅꀻꎆꈲꁧꐥꃅꄉꃨꆰꐨꋊꑣꄴꏮ，ꐪꊛꄉ“ꇥꀯꃅꇏꉀꐕꈎ”ꃅꈩ，ꈍꄮꑌꃅꐨꀋꎪꌠꌊꄐꌐꈌꃅꄉ，ꉌꏓꊋꋧꄉꍏꇩꐛꋲꐨꐥꌠꐛꏀꈴꆃꎭꐛꑊꀊꏀꀹꄻ。

   ꀈꎵꆞꁘꇫꄉꄜꇬ，ꍔꃚꌤꃅꅇꄜꌠꆹꊌꐨꀋꎪꀋꑴ，ꃅꒊꃅꇁꊒꌸꈆꑪꃅꄉꎥꃪ，ꂿꃆꀵꄜꆽꎍꐨꄐꁆꎼꇁ，ꇫꈴꁧꌠꋋꈓ，ꌜꑭꊂꀻꎆꐨꆹꊽꇬꈐꊟꊋꊡ，ꄾꌦꋩꃅꄉꌧꍧꀋꎪꃅꄉꎆꏣꀉꇨꌜꆽꎍꐨꀵꄜꌠꄛꑣꎼꇁ，ꎼꈎꀻꎆꁻꌐꆹꊽꇬꈐꊟꊋꊡꀒꁨꏹ，ꈍꃅꑌꌜꑭꊂꊿꋅꈁꐥꌠꏓꂱꎆꏣꏂꇫ、ꋈꄻꌠꉈꈽꌠꊋꇤꀒꁨꏹ。ꉪꊇꆹꉌꊢꑓꊢꃅꄉꌜꇬ꒜ꀉꒉꑍꂷꌠꋍꑞꋍꁁꏯꄐꇐꏤꁈꃄꌬ，ꏟꈯꀕꃅꄉꀊꅰꐞꄿꃅꀋꐛꌠꃅꄷꈧꌠꊋꇤꀒꁨꏹ，ꇤꐳꃅꄉꆽꎍꐨꀵꄜ，ꊋꈀꑌꃅꇤꄉꎆꏣꏂꇫ、ꀻꎆꒃꉇ、ꅐꀦꊋꇁꀦꋋꈨꏓꇱꋊꍬ，ꐛꋲꐨꐥꌠꂿꑘ、ꁰꁱꈩꆫ“ꀉꒉꀊꂾꌤꌕꐘ”ꃅꌊꉾ，ꃹꅼꃅꄉꇮꑘꀉꇨꍏ、ꂿꑘꀉꇨꍏ、ꁱꀕꈩꆫꀉꇨꍏ“ꀉꒉꀊꂾꄐꇐꏤꁈꌕꐘ”ꌠꃄꌬ。ꇤꐳꃅꄉꐛꋲꐨꐥꌠꊋꀯꐛꏀꈴꅐꑘꉻꑫ、ꊇꁧꀊꂥꃅꀻꎆꈲꁧꀊꏀꌠꌊꄉꌜꑭꊂꇴꉻꉻꁧꎁꃅꄉꑆꊋꀉꑌꃅꄉꅐꌞ。

   ꇊꊇꇫꄉꄜꇬ，ꍔꃚꌤꃅꅇꄜꆹꀋꎪꀋꑴꃅꄉꋌꃀꋋꈓꌤꃅꈧꌠꏓꈹꎼꇁ，ꃶꐚꐛꐪꇬꈴꄉꊋꋠꐨꈧꌠꎥꃪꎼꇁ，ꈆꑪꊒꌸꃅꄉꀋꃋꎼꈎꌤꃅꁻꌐꄐꁆꎼꇁ，ꋋꆹꌧꍧꃶꐚꐛꐪꇬꄉꄐ，ꌜꑭꊂꏓꂱꉌꉪꐨꇬꄉꄐ，ꊽꇬꈐꊟꊋꊡ、ꊋꇤꀒꁨꏹ、ꇫꇬꉜꂂꐯꉜꂂ 。ꐪꊛꄉꀊꅰꐞꄿꃅꀋꐛꌠꃅꄷꈧꌠꅉꀕꈴꃅꄉꊋꄏꇇꀨꌠꄹꏦꌬ，ꂿꑘꁡꇤꄇꈜꏲꂠꌋꃅꌠꊋꄏꇇꀨꊋꃤꀉꇨꇱ。

    ꒜ꈿꅉꇬ，ꑸꑦꂱ、ꍈꊈ、ꄳꑸꏲ、ꁉꉼꏤꆏꄚꊨꏦꉪꐨꉜꐨꄜ，ꑿꆺꎾꃝꁰꁱꈩꆫꅐꑘꀻꎆꌠꊋꄏꃆꂮ、“ꊯꉬꉬ”ꄐꎖꈯꄔꇬꊻꂷꃷꁨꐛꐈꐨꃹꅼꃅꄉꎥꃪ、ꇤꐳꃅꄉꇨꃛꅐꀦꆹꏮꌬꈧ、ꁁꒉꃅꄷꌌꇩꏤꄐꇐꏤꁈꀋꉬꀋꉆꅉꃅꋈꄻꌠꀋꂿꑘꊋꄏꇇꀨꐨꋋꈨꀂꏽꉪꐨꉜꐨꑠꄜꎼꇁ。